puisine si mbok

TRINIL

Trinil

Uga ing tlatah kutha Ngawi

Pinggir Bengawan Solo

Ing papan kono

Akeh tinemu balung-balung

Apa iya kaya ngono kuwi

Moyange manungsa

Kadya wanara

Trinil

Kang tansah ngawe-awe

Kadya paring cangkriman

Sapa sejatining manugsa

SRIGATI

Srigati

Salah sijine wana

Ing desa Babadan, Kecamatan Paron

Kabupaten Ngawi

Kang tansah asri lan alami

Kang rinegga kricak-kricike iline kali

Srigati

Kang tansah ngemu wewadi

Akeh para sanak kadang

Kang kepengin ngerti

Wiwit kadang desa

Nganti jaban negeri

Srigati

Dudu wana wisata golek senenge ati

Nanging,

Papan minangka sarana tentreme ati

SANG BAGASKARA

Sang bagaskara

Yen isuk,

Jumedul ing sisih wetan

Kang nggawa panguripan

Sakabehing janma

Sakabehing tetuwuhan

Sang bagaspati

Kang cumlorot ing saben ari

Kang paring daya mring awak mami

Mahanani bisa nyambut kardi

Ngabdi mring negari

Dhuh Gusti

Mugi-mugi

Sorote sang bagaspati

Mracenani padhanging ati

Tansah tuhu eling mring gusti

Dhuh Gusti

Mugi-mugi

Sorote sang bagaskara

Ngobong ati kang leno

Dadya manungsa

Kang tansah laku utama

SENDHANG TAWUN

Beninge tirta bajimu

Kinclong-kinclong

Kadya candra ing wulan purnama

Nanging

Aku dhewe gumun

Sauger ngilo ing beninge tirtamu

Kadya katon topeng mancawarna

Ireng, abang, kuning, lan putih

Apa iya iki?

Kang mbangun?

Apa ngrusak sliramu.

Kang nyata

Aku wis ora krasa tentrem maneh

Yen sambang ing bejimu

Senadyan

Beninge tirtamu

Tansah kinclong-kinclong

Kadya candra ing wulan purnama

BENTENG VAN DEN BOSCH

1839-1845

Dek warsa 1825-1830

Pangeran Diponegoro ngadani perang pupuh

Dudu perang keris, tumbak, panah lan mimis,

Nanging perange jiwa satriya klawan angkara murka

Perange Pangeran Diponegoro gawe giris para Walanda

Giris ora saka tumbak, panah, lan keris

Nanging giris karana jiwa satria kang ora tedhas mimis

Kanthi rekadaya Walanda kasil mikut Pangeran Diponegoro

Nanging jiwa semangate tansah mangalat-alat

Saindhenging Nuswantara

Uga ing tlatah Ngawi wektu semono

Maewu-ewu Pangeran Diponegoro

Natahake jiwa lan raga

Perang ngrangsang dur angkara

Dudu perange tumbak, keris lan mimis

Duk ing nguni

Landa tansah kejoderan

Gubernur Van Den Bosch bingung

Sigra yasa bentenng pendhem

Kanggo ngadepi Diponegoro-Diponegoro

KAGEM IBU

Nalika para aji

Jumeneng ing negari Nuswantara

Nuswantara gemah ripah loh jinawi

Sriwijaya dalah majapahit

Samirana sumilir adem, ayem, cles rumesep jroning kalbu

Angete rempah-rempah

Sumempyok ing negara ngatas angin

Vascodegama

Bartolomeus Dias

Cornelis De Hautman

Ngarkit baita ngarungi samudra

Angete rempah-rempah

Sirna saka pakartine dur angkara

Pribadi para ibu sirana ugi

Kagunan Ibu Kartini

Habis Gelap Terbitlah Terang

Kaum Ibu

Wiwit jumeneng ing pribadine

Ibu

Sampun kawandasa hasta warsa

Nagari kita merdika

Kula tansah angranti

Ibu tetepa pinangka ibu

Awit kula ajrih

Asih jengadhika sirna saking jaman

Awit jaman samangke, jaman edan

Pramila, asih jengandhika

Tetapa sajiwa kula

SUGENG RIYADI

Ing jaman kawuri

Nalika donya iki isih awang uwung

Tumuli manungsa kacipta dening Gusti

“Kun Fayakun”

Tekan titi wanci iki

Manungsa tansah kebak dosa

Pindha candra kasaputing mega

Sabab,

Blencong kang tansah kencar-kencar

Ing sajroning gunung agung, datan tembus

Anartani ing sasolah bawa

Manungsa tansah mamak mumuk

Bener lan cidra bakar kuwur

Namung kanthi siam kang sejati

Manungsa bakal tansah eling lan waspada

Bapak sumawana Ibu

Sugeng riyadi,

Minal aidzin wal faidzin